Nagari Kalera Bebas Corona

Tukang Tulih:
Indra J Piliang
Satangah Darek Satangah Pasisie

Sajak ketek, ambo acok mandanga sumpah-serapah. Biasonyo dari induak-induak. Sumpah nan tadanga, indak main-main. Sabana ngeri kalau diinuak-manuangkan.

Iko contoh-contohnyo:
– Ditembak patuih tongga waang!
– Kalera madu!
– Kalera waba!
– Cingkahak urang waang mah!

Tentu, sumpah menyerupai kutukan itu lebih banyak terdengar di daerah pasisie. Inyiak-inyiak ambo di darek, khususnyo Aie Angek, acok mambunguik. Heran mandanga sumpah-serapah itu. Untuanglah, ayah lai pandai manjalehan.

Iyo, panjalehan nan acok ambo ulang-ulang sampai kini. Urang Piaman, misalnyo, alah pasti bacaruik bungkang kalau basobok jo konco arek lawan barek.

“Lah tibo lho baliak baruak tumbuang ko di kampuang!” itu mode nan tadanga, kalau ambo maacahan kaki di Pasa Piaman.

“Anjiang balai ko lah manyalak lho liak a. Ndak ado tulang dapek sajak pagi?” baitu langsuang ambo baleh.

Alah bisa dipastikan, kato-kato bacaruik jo sumpah-serapah tu kalua untuak nan dakek-dakek. Ndak mungkin pulo urang lain tibo-tibo kanai pacaruik an.

Sajak zaman Corona tibo, ambo taingek baliak jo kecek-kecek saputa sumpah-serapah tadi. Dulu, kato “kalera” diambiak dari kato “kolera”. Nah, bisa ditebak, frase “kalera waba” barasa dari “wabah kolera”.

Orang Minang memang pandai dalam manyalin bahaso asiang manjadi bahaso Minang. Hukum M-D (Menerangkan – Diterangkan) menuruik patunjuak Sutan Takdir Alisyahbana, diubah manjadi Hukum D-M (Diterangkan – Menerangkan). “Wabah Kolera” adolah Hukum M-D. Pas diterjemahkan ka bahaso Minang, baubah menjadi Hukum D-M: “Kalera Waba”. Badai, ciek contoh lai, barasa dari duo suku kato nan mamakai Hukum M-D: bad day.

Nan jaleh, walau kolera lah bisa diubek, baitu pulo malaria, diare, jo panyakik lain, tetap sajo sumpah-serapah alun baubah lai. Antahlah, ambo lah jarang bajalan di halaman bulakang umah-umah warga nan panuah di anak-anak ketek. Biasonyo, kalau tasirobok jo umah-umah mode tu sadang bajalan, ado sajo sumpah Uni-Uni atau Etek-Etek ambo ka anak-anaknyo.

Pakiak nan paliang kancang biasonyo manjalang matoari tabanam. Pasti banyak karajo untuak anak-anak. Dari maelo-an kabau, mamasuak-an itiak, sambie mandi ka batang aie.

Kini Corona alah jadih buah muncuang. Kok diituang, bisa sajo kato-kato corona ko kalua dari muncuang labiah dari 250 Juta rakyaik Indonesia tiok hari. Bisa jadi labiah. Dek lah sadonyo nan mangecek, agak susah manjadi-an kato corona ko sabagai pilihan kato untuak mangganti kalera.

Dek sumpah masih babantuak kalera, samantaro kalera itu sendiri alah punah rarah, tantu susah pulo sumpah itu balaku. Kalera alah ndak mangkuih lai untuak jadi kutukan dek amak-amak nan sadang berang.

Sakalipun corona lah jadih buah muncuang, tantu ndak ado nan manjadikannyo sabagai kutukan doh. Sia pulo urang nan ingin manyumpah-an urang tadakek jo inyo dapek infeksi corona ko. Dek sumpah kalua ka urang dakek, induak ka anak misalnyo, tantu alun lahie lo amak atau mande kanduang nan mode tu.

Dek induak alun ado nan lahie, tantu anakpun samo-samo ndak ka timbue dalam atinyo untuak manyumpah-an amaknyo.

Baa kok itu? Lah jaleh, kalau anak kanai corona, induak sudah pasti ikuik pulo dikarantina. Kok induak bana nan kanai, bara banyak anak-anak, ayah, jo anduang bagai nan dites dek mantari kesehatan. Tesnyo ndak sakali, bisa duo kali. Kok sampai kanai infeksi pulo, alah kacau kabirau.

Dek corona alah datang, tantu nagari kalera alah wakatunyo punah pulo. Dek baliuang alah tibo di kaki, siriah lah tibo pulo di tampuak pinang, tantu kini pulo saatnyo mailang-an sado alahe kecek-kecek nan ndak paguno tu. Awak coret lai kato-kato kalera waba, kalera madu (madu tu samo jo maonggoh di batang aie), patuih tongga, cingkahak, jo sagalo macam-ragam namo-namo binatang bagai.

Banyak kato-kato nan lain nan bisa diambiak. Kato-kato adolah doa. Ndak bisa awak maagiah urang masker, jan muncuang urang lho dipacaruik-an panjang. Doakan sajo urang nan ndak bamasker itu bisa dapek saputangan, bia bisa manutuik muncuang katiko sadang pai bajalan. Atau, doa-an urang itu bisa dapek razaki labiah, bia kato-kato pun bisa baubah manjadi pintu razaki buek urang banyak.

Kalera tagang! Jan sampai corona lho nan manang! Cukuik-lah kabau urang Minang nan manang di nagari nangko…

Jakarta, 12 April 2020

Comment